Горната слика е направена со Хабл во 1995 година и на неа се гледа точката со дијаметар од околу 21,000 километри. На средната слика е истата точка со дијаметар од 18,000 км во 2009 година. И на крајот е фотографијата од 2014 кога оваа точка е со засега најмал дијаметар и има околу 16,000 километри. Заслуги: НАСА/ЕСА.
Уште на почетокот на оваа година се зборуваше за намалувањето на најпознатата бура во Сончевиот систем, односно црвената точка на Јупитер. Сега, астрономите со помош на набљудувањата од Хабл и официјално прогласија дека нејзиниот дијаметар е со досега најмали димензии и изнесува 16.500 километри.
Цртеж на Јупитер направен во 1880 година од страна на францускиот уметник и астроном Етиен Трувело на кој се гледаат сенки од месечините и значително поголема црвена дамка.
На историските нацрти и слики од крајот на 1800-тите астрономите утврдиле дека тогашниот дијаметар на црвената дамка е 41.000 километар, па дури и со најмал телескоп дамката би изледала огромно. Со аматерски опсервации уште во 2012 година беше забележано дека стапката на смалување на бурата забрзано расне во последниве години.
Така сега, во должина оваа дамка се намалува околу 1.000 км годишно, додека во големината од горе до доле нема значајни разлики. Со самото ова се менува и нејзината форма кон покружна.
Засега нема конкретни објаснувања за причините кои го предизвикуваат ова намалување на бурата.
Големата дамка на Јупитер е лоцирана јужно од развиорениот Јужен екваторијален појас. Гигантската бура веќе 400 години е како активен ураган. Врвот на бурата се издига 8 км над облаците и ротира во насока спротивна на стрелките на часовникот на секои 4 дена. Оваа фотографија беше направена на 21 Април, 2014 година. Заслуги: NASA / ESA / A. Simon.
Извор: Universe Today
Превод: Михаела Стојанова
