Податоците од вселенското летало Нови Хоризонти на НАСА, кое претходно во текот на неделата го истражи Кајперовото тело Ултима Тули, секојдневно носат нови научни откритија. Некои од наодите на научниот тим на мисијата се:
– Првичната анализа на податоците не даде докази за постоењето на прстени или сателити со пречник поголем од една милја (1,6 километри) во орбита околу Ултима Тули.
– Анализата на податоци не покажа ни атмосфера.
– Бојата на Ултима Тули се совпаѓа со бојата на слични светови во Кајперовиот појас, што беше одредено со телескопски мерења.
– Двете топки на Ултима Тули – првиот посетен бинарен систем од Кајперовиот појас – се со речиси иста боја. Ова се совпаѓа со нашите познавања за бинарни системи кои немаат стапено во заемен контакт, туку орбитираат околу заедничка гравитациона точка.
Преносот на податоци од Нови Хоризонти ќе запре за околу една недела додека леталото поминува зад Сонцето, гледано од Земјата. Преносот ќе продолжи на 10ти јануари, започнувајќи дваесетмесечно симнување на остатокот на научните богатства на Нови Хоризонти.
Научниот тим на Нови Хоризонти ја создаде првата стерео слика од пар слики од Ултима Тули. Гледана со стерео очила, оваа слика ја открива тридимензионалната форма на телото од Кајперовиот појас. Парот слики кои ја сочинуваат оваа стерео слика ги сликаше Далекудосежниот извиднички апарат (Long-Range Reconnaissance Imager – LORRI) во 4:23 и 5:01 по универзално време на 1ви јануари 2019 од оддалеченост од 61000 и 28000 километри, со размери од 310 метри и 140 метри. Заслуги: NASA/JHUAPL/SwRI
Во оваа анимација создадена од две слики од Кајперовото тело Ултима Тули сликано во интервал од 38 минути, топката „Тули“ е најблиску до вселенското летало Нови Хоризонти. Како што ја гледаме ротацијата на Ултима Тули, можеме да забележиме делови од нејзиниот релјеф. Заслуги: NASA/JHUAPL/SwRI
Превод: Јоаким Јаковлески
Извор: jhuapl.edu
