Уметничка илустрација на карпест астероид богат со вода кој се распрарчува поради силните гравитациски влијанија од белото џуџе. Слични објекти од Сончевиот систем имаат донесено голем дел од водата. Извор: Mark A. Garlick, space-art.co.uk, University of Warwick
Доставата на вода на планетите преку комети и астероиди е честа појава и во многу други планетарни системи, исто како и во нашиот. Според новите истражувања се докажува дека ова е начинот на кој водата станала дел од нашата планета. Се претпоставува дека Земјата првично била суво место и присуството на вода е резултат на бројните удари на комети и астероиди.
Според главниот истражувач, д-р Роберто Ради од Универзитетот во Варвик, Англија се потврдува дека астероидите богати со вода како во нашиот Сончев систем не се само исклучок, туку можат да се најдат и низ останатите планетарни системи.
Со опсервации направени со телескопот Хершел (Herchel), кој се наоѓа на Канарските острови, астрономите детектирале огромно количество на водород и кислород во атмосферата на бело џуџе (SDSS J1242+5226). Огромните количества укажуваат дека водата била донесена преку удар на астероид богат со вода. Преку овој процес дел од водородот и кислородот се размешуваат во атмосферата. Астероидот има слична големина на најголемиот астероид во нашиот систем, Церера, со должина од 900 километри. Пронајденото количество вода на белото џуџе претставува околу 30-35% од океаните на Земјата.
Кислородот е релативно тежок елемент, па така тој од атмосферата ќе потоне надолу за одредено време по ударот и нема да биде видлив. Спротивно, водородот е најлесниот елемет и тој секогаш ќе остане да лебди каде ќе може да биде лесно детектиран. Постојат многу бели џуџиња кои се богати со водород во атмосферата и според оваа нова студија ова претставува доказ за честата појава на астероиди и комети со големо количество на вода во својот состав.
Превод: Михаела Стојанова
Извор: Phys
