Кјуриосити (Љубопитност – Curiosity) поминал низ доста предизвици. Двегодишна мисија во својата осма година, бурни сезони, закопувања во прашина… а сепак роверот сеуште се тркала по црвената планета и открива неверојатни нешта.
Заслуги: НАСА/JPL-Калтек
Но понекогаш, дури и на Марс, може добро да дојде одмор и поглед кон ѕвездите. Или, за Кјуриосити, поглед кон правливото Марсово небо, подзамижување и надеж дека можат да се видат Земјата и Венера.
Пред околу месец дена, Кјуриосити ја насочи својата јарболна камера (Mastcam) кон небото час по зајдисонцето и сликаше две слики – една од Земјата и една од Венера.
На Земјата, тимот на Кјуриосити ги спои двете слики за да направи панорама, и резултатот не потсетува дека Кјуриосити е далеку од дома.
Заслуги: НАСА/JPL-Калтек
Како што можете да видите на сликата погоре, двете планети се одвај видливи – само мали светлосни точки на силно осветленото небо. Но не изгледаат секогаш така.
„Дури и прилично светли ѕвезди не биле видливи кога оваа слика од Венера била сликана,“ вели истражувачот за јарболната камера Марк Лемон од Институтот за вселенски науки во Болдер, Колорадо.
Во ова време од годината има прилично големо количество на прашина во Марсовата атмосфера. Оваа прашина одбива сончева светлина, што го осветлува небото и го отежнува гледањето на ѕвезди.
Во 2014, јарболната камера сликаше уште една слика од Земјата – во таа слика небото беше значително потемно, а дури и Месечината е видлива.
Заслуги: НАСА/JPL-Калтек/MSSS/TAMU
Како и да е, прашината поминува и заминува на црвената планета. Наскоро нивото на прашина во небото ќе биде попригодно за набљудување на ѕвездите.
Во меѓувреме, Кјуриосити ќе ја свисне главата истражувајќи ја Марсовата планина Шарп, каде се има тркалано од 2014.
На дното на панорамската слика може да се види кулата Бут – мал рид кој Кјуриосити го помина доцна во мај.
Ова само покажува како можете да видите каде сте биле ако подзастанете и погледнете нагоре.
Превод: Јоаким Јаковлески
