Пред речиси 50 години, многу луѓе низ светот беа залепени за малите екрани, гледајќи како човештвото за прв пат зачекорува на месечината. И иако многумина стравуваа дека трите астронаути на Аполо 11 нема да успеат безбедно да се вратат на Земјата, тие најверојатно не знаеле во каква опасност навистина биле астронаутите.
Нил Армстронг, Едвин „Баз“ Олдрин и Мајкл Колинс отидоа во вселената во Сатурн V ракета на 16 јули 1969 год., а се вратија на 24 јули, слетувајќи во Северниот Пацифички Океан. И покрај успехот на мисијата на НАСА, всушност постоел подготвен говор за претседателот Никсон во случај на катастрофа.
Заслуги: Пиксабеј
Најголема веројатност да се случи катастрофа имало по слетувањето на месечината, кога Армстронг и Олдрин се вратиле за да му се придружат на Колинс во командниот модул. Франк Борман, астронаут при Аполо 8 и посредник на Белата куќа, му се јавил на пишувачот на говори на Никсон, Вилијам Сафир, за да го предупреди за оваа можна трагедија.
„Би сакале да размислите и за поинаков став на претседателот во случај на незгоди,“ се присетува Сафир на зборовите на Борман, „Можам и сега да чујам како ми вели: „На пример, што ќе направиме за вдовиците“.“
„Ако не можеа да се лансираат, а постоеше голема веројатност за тоа, тогаш тие би морале да бидат напуштени на Месечината, оставени за таму и да умрат“, изјавил Сафир во интервју во 1999.
Заслуги: Пекселс
„Тогаш контролниот центар би морал – да се изразам со нивниот еуфемизам – „да ја прекине комуникацијата,“ и луѓето таму или ќе изгладнат до смрт или ќе се самоубијат,“ рекол тој. И затоа се подготвивме со говорот кој го напишав, и претседателот беше подготвен да го даде тој говор.“
На 18 јули, вториот ден на мисијата, Сафир пратил нацрт на неговиот говор, насловен „Во случај на месечева катастрофа“, на Х.Р. „Боб“ Халдеман, шефот на кабинетот на Никсон. Целосниот говор следува вака:
„Судбината одредила дека луѓето кои отидоа на месечината да истражуваат во мир остануваат за да почиваат во мир.“
„Овие храбри луѓе, Нил Армстронг и Едвин Олдрин, знаат дека нема надеж на нивниот спас. Но тие исто така знаат дека во нивната смрт има надеж за човештвото. Овие двајца чесни мажи ги положуваат нивните животи за најблагородната цел на човештвото: потрагата по вистина и разбирање.“
„По нив ќе тажат нивните семејства и пријатели; по нив ќе тажи цела наша нација; по нив ќе тажат луѓето на светот, по нив ќе тажи мајката Земја која се осмели да прати два од нејзините синови во непознатото.“
Заслуги: Пекселс
„Во нивното истражување, тие ги поттикнаа луѓето на светот да се чувствуваат како едно; во нивната жртва, тие поцврсто го поврзуваат човештвото.“
„Во дамнешните времиња, луѓето гледале во ѕвездите и ги виделе нивните херои во соѕвездијата. Во модерната доба ние го правиме истото, но нашите херои се легенди од крв и месо. Ќе следуваат и други, кои сигурно ќе го најдат патот назад до дома. Потрагата на човекот нема да биде откажана. Но овие луѓе беа првите, и остануваат најважните во нашите срца.“
„Сега, секое човечко суштество кое ќе погледне во месечината во ноќите кои ни следуваат ќе знае дека постои некој дел од друг свет кој е засекогаш човештво.“
Иако ова стана прекрасен момент на славење за Соединетите Американски Држави, морничаво е да се помисли што би можело да се случи ако нешто тргнело наопаку.
Превод: Јоаким Јаковлески
Извор: VT.co
