Структурата на простор-времето во состојба на затворени патишта на простор (хоризонтално) и време (вертикално). Квантната честичка патува назад низ времето преку црвја дупка и се враќа на истата локација во простор-времето. Заслуги : Мартин Рингбауер
Изгледа дека патување низ времето е навистина возможно, барем кога станува збор за светлинските честички.
Користејќи фотон, физичарите успеале да извршат симулација каде квантните честички патувале низ времето. Проучувањето на однесувањето на фотонот би можело да биде од помош за научниците при разјаснување на одредени необјасниви аспекти на модерната физика.
“Темата поврзана со патување низ времето се наоѓа меѓу двете најуспешни, но сеуште некомпатабилни физички теории – Ајнштајновата општа релативност и квантната механика“, вели Мартин Рингбауер од Универзитетот на Квинсленд. „Ајнштајновата теорија го објаснува Универзумот од аспект на големте објекти како ѕвездите и галаксиите, додека квантната механика е одлично објаснување за најмалите објекти како што се атомите и молекулите.“
Според релативната поставеност и движењето на еден објект во однос на друг, времето или ќе се забрзува, или ќе забави. Ајнштајновата теорија ја укажува можноста за патување назад низ времето преку следење на пат низ простор-времето кој се враќа назад до точката на почеток во просторот, но во претходно време. Ваквиот пат се вика затворена временска крива (прикажана на сликата) и претставува црвја дупка низ која може да се патува.
Според авторите, парадоксот за патување низ времето во квантниот режим може да биде разрешен, правејќи ги затворените временски криви доследни со релативноста. На пример, во близина на црна дупка, голема улога имаат екстремните ефекти на општата релативност.
Како што е прикажано погоре, квантна честичка патува назад низ времето преку црвја дупка и се враќа на истата локација во простор-времето.
„Својствата на квантните честички, како за почеток, се нејасни или несигурни, а тоа дава доволно простор за да се избегнат неконзистентни ситуации поврзани со патувањето низ времето,“ вели Тим Ралф. „Нашите изучувања овозможуваат согледување на тоа каде и како природата би се однесувала различно, во однос на претходно предвидени теории.“ Тука се вклучени и нарушувањата на Хајзенберговиот принцип на несигурност, пробивањето на квантната криптографија и совршеното клонирање на квантните состојби.
Извор: IFLS
Превод: Бојан Андоновски
